Zimbabwe te’n “Independence Icon” cih pahtawina min a piak uh Robert Mugabe pen kum 95 acin kum in si hi. Tukum April kha in Singapore zato ah kibawl hinapi dam zo tuan lo ahihmanin a luanghawm pen ama gamah vanleng tawh Singapore kumpi in puakkik hi. Amah pen kum 37 sung thuneihna a let khit ciangin 2017 kumin a thuneihna kilaksak hi. Hih hong nusia Preaident lui Robert Mugabe pen a mipihte ading cidamna leh pilsinna lam a hanciampihna hangin minpha ngah mahmah ngei hi. Ahizong asawt loin politics sungah ama langhpangte tungah tatsia lua ahihmanin gambup in sumlehpaai lamah gentheih lawh hi. Ama nungah President a sem Emmerson Mnangagwa in a genna ah Robert Mugabe pen “Icon of space liberation” min akipiak pen ama hihna tawh kituak lo lua ahihmanin ka dah mahmah hi ci hi. Amah pen Mugabe in a khuttaklam bangin a zat ngei khat na hi ngei hi. Robert Mugabe ih cih pen kua hiam? 21 February 1924 kumin Rhodesia gamah piang hi. Tua hunin Rhodesia pen British uk sungah om hi. 1964 kumin Rhodesia kumpi a gensiatna hangin thudotna om loin kum 10 val thong kikiasak hi. Thong sungah a om laipi mahin 1973 kumin Zimbabwe African National Union (Zanu) in Founding member khat ahihna tawh gambup President dingin teel uh hi. Hong suahtaak ciangin Mozambique gam uk pah a, tua kawmin Rhodesia gam pen thauvui thautang tawh sim kawmkawm hi. Lamkhat panin amah pen mipil ahihmah bangin mi tawh kiholem dan siam mahmah hi. Tua hangin Republic of Zimbabwe gamthak hong piang thei ahihi. Mi mawkmawk hi nawn lo ahihmanin 1980 kum kiteelpi masapen ah nasia takin gualzawhna ngah pah hi. Kum tampi khit ciangin amah a langhpante in Dictator danin thuneihna khempeuh ama khut sungah a koihcip nuam danin gen uh hi. Mugabe pen politician hangsan mahmah khat ahihi. Mikaangte ukna sung panin mivomte honkhia in gamthak a satpihpa ahihi. Kum tampi sung ama khutnuaiah Zimbawe pen gamhau leh gam khangto khat suak a, ahizongin gamsung economy hong kiat luat vat ciangin Mugabe pen a lungsim hong kilamdangin a tawpna ah gamsung ki-ukzia zong buaina vive hong suak ta hi. Security te’n Mugabe leh a party pen tawmvei sung hung zo taleh a tawpna ah gaalkapte in Mugabe pen langhpan in thuneihna sung panin hawl khia uh hi. Ama hangin gambup in a siat lawh hong suak ta a, tua hangin thuneihna a kilensak nawn lo suak hi. 2000 kumin ama gam sungah mikaangte neihsa gam teng suhsak in, 2008 kiteel kum ciangin amah a langhpante tungah thatang hatna suangin nasia takin bawlsia hi. Tua khit ciangin, “Ka dinmun panin Pasian bekin hong lakhia thei inteh” ciin gen lai hi. A tuuksiatna bulpi pen a zi in ama dinmun luah dinga a muanmawhna hang ahihi. Ahizongin haksatna tampi kawmkalah 2017 kumin a zi Grace pen ama zalaih dingin geelna nei hi. Tua pen kum tampi a kithukimpih galkapte in deih lo uh in aana tawh Mugabe pen ama panmun panin sawn khia uh hi….
