Australia gam pen democracy ahih manin kum 18 a cing khin Australia gammi hihna a neih khempeuh in vote khiat hamtang kul hi. Vote khiat ni ding a a kiciangtan ni, ahih kei leh vote khiat ni ding a a kisehsa ni tun ma-in zong vote kikhia thei hi.
Australia Constitution Section 28 na a kigelh bangin House of Representatives kiteelna kum 3 in khat vei beek neih ding kisam hi. Prime Minister in kiteelna vote khiat ding ni seh a, tukum a dingin May 18, 2019 teel hi.
Australia parliament ah House of Representatives member 150 om hi.
House of representatives teel zia:
Member kim “preferential voting sytem” kici zangin kiteel hi. Electorate khatah candidate khat in absolute majority (a lang sang a tamzaw) vote ngah a kiteel cing theih ding a a kibawl hi. Hih system (kiteelzia) ah, vote khia dingte’n candidate-te min bul ah nambat gelh ding uh hi. I deih penpen candidate min maiah ‘1’ gelh ding hi a, tua banah a nihna i deih pen 2 cih bangin a banban in gelh ding hi.
Candidate khat in a lang sang a tam zaw (absolute majority) nambat 1na a ngah leh amah pen a kiteel cing hi pah hi. Candidate te lakah kuamah in a lang sang a tamzaw vote a ngah kei uh leh, candidate te lak panin vote ngah tawmpen kila khia ding a, a vote ngah teng a dang teng kihawm ding hi. Hih vote kihawm pen mi khat in 50% vote a ngah masiah kihawm toto ding hi.
Tua banah Senator zong om lai uh a, state khat in senator 12 ciat nei-in, terrritory ten 2 tuak nei uh hi. State Senatorte pen kum 6 a cin simin kiteel bek a, ahih hangin senator khempeuh seh nih suah seh khat pen kum 3 hal ta-in a sephun uh tawp hi.
Territory Senatorte leuleu pen kum 3 hal in House of Representatives leh Senate a tu ding a langte tawh kiteel khawm hi.
Senator te kiteel zia:
Amaute kiteel zia pen proportional representation kici hi. Vote khiate-in teel zia nam 2 tawh deihteel thei uh hi. Above the line leh below the line – a tung leh anuai khat zawzaw teel thei hi.
Above the Line i teel leh – vote khiate’n nambat 1 pan 6 political partyte ahih kei leh kipawlnate teel ding uh hi. Nambat khatna a ngah tam pen te kideihsak tuam masa ding hi.
Below the line i teel leh – vote khiate in candidate mimal te min gei ah nambat 1 pan 12 gual ding hi. 1 na pen i deih pen i min geiah koih ding hang a, tua khat i deih dan a nambat piak ding hi.
Senator a kiteel cing theihna dingin nambat 1na a ngah kul hi. State Senator a dingin state khempeuh vote i 14.3% tawh kikim hi. Territory senator in territory vote khempeuh i 33.3% a ngah leh kiteel cing hi ding hi.
Deakin electorate candidate:
Deakin in a huam – Mitcham, Vermont, Vermont South, Ringwood, Heathmont, Croydon, Bayswater North
Hih munah Liberal Party min tawh a ding – Michael Sukkar hi.
Amah pen kum 37 pha pan hi. Ringwood ah khangkhia hi a, Aquinas College ah sangkah hi. High School a man khit ciangin Bachelor of Laws leh Bachelor of Commerce Deakin Uni, Burwood panin man hi. Tua khit ciangin University of Melbourne panin Master of Laws zo hi. Kum 2013 kumpi kiteelnaah kitelcingin, kum 2016 ah zong gualzo leuleu hi. January 2017 in Asissitant Minister to the Treasurer panmun na ngah hi.
Labor party candidate: Shireen Morris hi.
Amah pen North Ringwood pan a khangkhia hi-in tulaitak Nunawadingah teeng hi. Australia gam a piang hi-in india leh Fiji-Indian minam kahbia hi. Amah pen lawyer hi in constitutional law tawh PhD a ngah khat hi. Cape York Institute ah kum 7 sung sem-in, tulaitak Melbourne University Law School ah post doctorate a sin laitak hi.
Aman laibu 3 gelhin thoh khinta hi.
