Identity kiguksakna pen tulaitak Australia ah laang mahmah hi. A diakin mimal Mail kiguksak pen uang zaw lai a, agute pen a mail neite danin kibawl tawmin haksatna tampi leh supna lianpi piangsak uh hi.
Kum 27 a pha Taylor Dent ama thuakna hidanin gen hi. “Khatvei laito zumpi panin keima ngah ding parcel khat a om thu hong kizasak hi. Kei zong ka va pai pah leh ka parcel pen midang khatin na la khin hi. “CCTV panin ka etkik uh ciangin nupi samsan khatin ka parcel pen na ciahpih mawk hi. Nasempa in tua nupinu ka theih leh theih loh hong dong a, thei kha keng, ka omna kiim tengah zong amah dan mu ngei keng ciin ka dawng hi” ci hi. A theih loh kaalin Taylor Dent pen a Identity midang khatin a guuksak na hi gige mawk hi. A laikhak ngah ding khempeuh leh a parcel ngah ding khempeuh pen midang khatin a ngah den na hi mawk hi.
Tua bek hileh phadawm lai, gutaanu in Taylor Dent ii nuntakna pen a theih lohin ama khut sungah a humcip khin na hi sawnsawn lai hi. Lauhuai mahmah hi. A sawt loin gutaanu in Taylor ii neih Woolworths account zong hack sakin ama ngah ding hamphatna leh letsong teng laksak hi.
Tua banah ama neihsa Paypal, Opal card, Airbnb leh Velocity rewards khempeuh zong gutaanu in nuam takin ama neihsa danin sawksak ziahziah lel hi. “Hibang guktaakna a om lam pen palikte in a theih zawh uh sawtpi hi khin hi” ciin Linda Howlett gen hi. Amah pen detective ulian khat ahihi.
Na Mail box pen hidan gutaate in lunglut penpen uh hi. Tua ahihmanin nang leh na kikepna dingin a nuaiate zui in.
- Na Mail box kalh den in.
- Bank ah pai inla Bank tawh na kizopna teng limtakin sit den in.
- Na anti-virus (virus daalna) software pen update den in.
- Na phone sunga om SOS signal pen hoih maw hoih lo sit den in. Nidang a mobile signal na ngahna munah signal om kei leh na phone zong hong kikhoihsimsak hi thei hi.
source: 9news
