Autralian numei khat in mite ID tul val guuksak in, sum tampi a laksakna hangin Australian mi khempeuh pen a super balance uh limtak en dingin palikte tung panin zaksakna kinei pah hi.
Nasemte pension Ngah ding leh sumbawlna a mite ngah ding Share panin $10 million val kiguuksak hi ciin Melbourne thukhenpipa in gen hi. Jasmine Vella-Arpaci pen mikhemna case 53 val tawh a kiman khin ahihi.
Superannuation ih cih pen nasemte in a pension ding vua a khol thiamthiam uh sum ahihi. Hih sum kikholna REST SUPER leh HESTA zong mikhemte in na sungluh khin uh hi cih thu Thukhenzum in their khin hi. Tua banah gambup vanzuakna Minthang khat ahi CommSec zong mikhemte mah in na sungluh khinin Customerte’ data tampi laksak khin uh hi. Hih thu hangin zanni Tuesday niin palikbu Chris Goldsmid in mipite tungah na super balance uh limtakin enpha uh cih thu zasak hi.
Thukhenzum in Ms Vella-Arpaci leh a kipawlpihte in midangte account panin $1.73 million laksak khin uh cih thu muanmawhna om khin hi. Palikte genna ah mipite in a pension ding vua a khol thiamthiam uh sumte encian kik in hileh khemtuak mi bangzah om khin hiam cih kitheih beh ding hi ci uh hi. Hih mikhemte gamtatna hangin Club Plus Superannuation, HESTA, Hostplus, AustralianSuper leh LUCRF Superannuation tengin thuak lawh mahmah uh hi.
Hih mikhemte in midangte ID a guksak theihna uh pen Advertisement pan leh mite letterboxes sung pan a hihi kici hi.
Thukhenzum in Tuesday niin a zaakna ah kum 21-year-old apha Derrimut Nupi khat leh a lawmte pen “Moneymonkey”, “H”, “Elvy X”, “Steven Rocks” leh “Kevin Butwell”, cih bekin kithei uh a, a mikhemte u suahni pen Superannuation account panin laihsak in tua ciangin a sum uh laksak uhhi. Mite document a guuksak teng utawh Westpac leh NAB bank ah account hong uh a, tua laiah sum teng khak uh hi. Tua ciangin account bawlsa tengah debit cards pen Hong Kong ah khak sawn leuleu uh hi. Tua debit cards tawh van manpha tampi leiin zuakin sumbawl uh hi. Tua danin kipeisak uh hi cih thu ahihi.
Tukum April kha in palikte in Ms Vella-Arpaci omna va pheklek uh a, a mikhemte ii details leh foto tampi pen ama computer leh mobile sungah va mu uh hi.
Mikhem pawlte in online ah VPNs tawh a hihna taktak uh seel in “Team Awesome” leh “Team Papa” kiciziau uh hi cih thu zong Thukhenzum panin kithei hi. Nung kha in The Age leh The Sydney Morning Herald in a genna vuah mikhem nupinu leh a zat passport pen palikte khut sung Tung khin hi ci uh hi.
Vella-Aparci pen kiman khin a, ahizongin Bail tawh kikhah khia kik hi. Maikum Feb. 11 ni ciangin Thukhenzum tung kik ding hi. A passport zong kumpite in kepsak uh a, naseppih a lawmte tawh kiho ding zong a kikhaam ahihi.
